Intal ambiti dal progjet “O voi a divertimi…SIGÛR! O cjapi la coriere”, cul sostegn de Polizie Stradâl e dai Carabinîrs, SAF Autoservizis e la Provincie di Udin a àn potenziât il colegament Udin-Lignan cuntun servizi atîf dutis lis sabidis di Lui e Avost 2007, che al partive di Udin aes 22.30 e al rientrave di Lignan la domenie a buinore (05.30). La esperience di trasferiment viers il divertiment cul mieç public e à vût une vore di sucès, tant che e sarà ripetute par l’istât 2008, e costituìs cence fal une otime soluzion par sparagnâ energjis, bêçs e ….preocupazions pai gjenitors che, in tal maniere, a son plui in vene di lassâ libars i fîs di lâ a divertisi la sabide di sere.

In colaborazion cun ALEF (Associazion Lavoradôrs Emigrâts FVG), UCAI (Union des Comunitâts e des Associazions di Emigrâts) e CAFC (Consorzi Acuedot Friul Centrâl), SAF e à partecipât ae realizazion di un progjet finanziât de Regjon FVG che al à l’obietîf di facilitâ la integrazion des personis forestis, in particolâr extracomunitariis, tal FVG cul superament des dificoltâts inte fruizion dai servizis e, in particolâr, de mobilitât publiche. 
Saf è a cussì inmaneât doi seminaris di formazion riservâts a une trentine di mediatôrs culturâi che a provegnin di diviersis areis internazionâls plui presintis in regjon, dulà che i stes, a traviers i intervents par cure de SAF, CAFC, Regjon e Provincie di Udin, a son stâts istruîts in relazion al servizi di TPL e erogazion de aghe, cul fin di podê ativâsi intal dâ adeguadis informazions, intune fase seguitive, ai conazionâi che a son residents intal teritori. 
Il progjet al à cjatât un moment di realizazion inte publicazion di une sorte di vuide al ûs, che al ten lis regulis par une corete utilizazion dal servizi di traspurt public e distribuzion de aghe: la vuide e je stade publicade in 14 lenghis tra lis cuâls il talian e il furlan.

Il progjet pal sostegn de sigurece de strade clamât “O voi a divertimi…. Sigûr!” al è continuât cun gnovis inizativis cul fin di svissinâ l’autobus in particolâr ai zovins. In colaborazion cul Comun di Udin, Dipartiment des politichis sociâls, educativis e culturâls - in ocasion de fieste pal desenâl dal Informezovins e de visite di studi e cunvigne europeane cu la partecipazion di delegazions de Olande, Polonie, Ongjarie e Austrie – e je stade programade la iniziative DISCOBUS cun “on bord” cuatri cognossûts DJs, lis lôr consolles e i lôr CD. 
Il percors al à interessât Udin e i locâi di divertiment cun 8 fermadis dulà che in ognidune, par 30 minûts, i zovins a àn balât e si son divertûts inte “discoteche sot lis stelis” montant e dismontant dal autobus a lor plasê.

Intal ambit dal progjet “O voi a divertimi…..sigûr!” SAF e à aderît di gnûf ae edizion di primevere dai 3 di Avrîl dal Ceghedaccio, l’apontament plui spietât pe musiche agns ‘70 e ’80 e pal divertiment di ducj chei che a amin la musiche di discoteche e i sucès pop dal passât. La fieste si è davuelzude tal padilion 6 de Fiere di Udin, simpri des 9 soresere ae 1,30 di buinore, rispietant chei che tal passât no tant lontan a jerin i oraris des discotechis. 
Par dut il popul dai “ceghedians” il program cu la buine musiche si è disvelât inte ormai colaudade scjalute firmade di Renato Pontoni, cui lents e cul spazi dedichis. 
Ancje cheste volte in grant numar a son stadis lis prenotazions par cui che al à volût rivâ al divertiment in coriere, graziis ai pulmans SAF in partence di Triest cun fermadis a Monfalcon e Palme, di Gurize cun fermadis a Cormons e Manzan, di Pordenon e Codroip e di Tumieç e Glemone.

Ancje chest an SAF e à compagnât diviersis sezions dai Alpins dal FVG ae adunade nazionâl di Bassan, metint a disposizion par ducj i dîs de adunance, cirche 30 corieris e organizant un grant servizi di nauli.

... si è tratât di une mostre viazant a traviers i dirits e i dovês di chel che si môf in autobus…
... al è un progjet dedicât ae infanzie realizât denti di “EQUOSERVIZI – citadinancis in moviment”, promovût di ALEF, UCAI e SAF 
... al è un laboratori che al à interessât cirche 60 fruts e frutis de scuele elementâr “A. FRIZ”, lis lôr insegnantis e la Direzion Didatiche… 
... al è un percors viert, un viaç jenfri dirits e dovês, une scuvierte dal nestri jessi citadins, un spazi par confrontâsi, un pont di incuintri tra chel che al realize servizis e chel che ju dopre…
... e je une mostre itinerante inmaneade dentri di un autobus che al jes de scuele e al travierse dute la citât ...

Pal tradizionâl apontament cul bevi ben i servizis chest an a son stâts une vore inovatîfs: cu la vuide Gps personâl o cul bus, cu la machine o in biciclette, tancj a son stâts i mûts par vivi e lâ dentri di Cantinis viertis. SAF e à partecipât ae iniziative promovude dal Moviment turisim dal vin FVG, organizant un sevizi che al jentre intal progjet “O voi a divertimi…sigûr!”. Domenie ai 25 di Mai (cun prenotazion) cun partence dai cuatri cjaflûcs di provincie si è podût vivi la esperience di Cantinis viertis in dute tranculitât parsore di cuatri pulmans SAF che a àn seguît un itinerari di pueste dentri lis areis puartadis ae agricolture de regjon fasint soste in cualchi aziende associade a Mtv.

Aromai la cussì clamade "cene di matura" e costituìs propit un event par ducj i students, une tape impuartante te vite dai zovins che simpri plui spes (forsit la maturitât e je ancje cheste) a organizin la serade/notade tai plui piçui detais, afidantsi ai operadôrs dal setôr dai traspuarts. A son i grups sengui (pal solit dividûts par istitût) che a ordenin i servizis par spostâsi dal puest di cjatâsi al ristorant, dopo in diferentis discotechis nomenadis e dopo… magari tes splazis de cueste. Chest an SAF e à partecipât a chestis fiestis scolastichis e zovanîls, organizant une ventine di servizis a nauli par classis, o grups di classis, di diferents istitûts.