La sezion e je vierte a ducj i Clients SAF che a àn doprât il servizi di turisim par fâ un viaç, une trasfierte sportive, une gjite scolastiche. Al è pussibil, mandant une mail ae direzion marketing@saf.ud.it, spedî lis fotos plui bielis e plui significativis des vacancis, ancje se il viaç al è stât curt: a saran publicadis in chest spazi, metint adun une vere galarie fotografiche.
Pe publicazion bisugne specificâ te mail: i dâts dal viaç e la autorizazion ae publicazion e la rinuncie ai dirits colegâts. Se si vûl si pues zontâ une didascalie ilustrative curte.

Pal XVIII aniversari de colade de cortine di fier (Zornade de memorie) une delegazion di rapresentants de Associazion Culturâl Mitteleuropea e je stade in visite a Cracovia, dulà che à partecipât ae cerimonie di memoreazion dal 2 di Mai. Il zîr, daspò, al è continuât cun visitis ae citât, ai siei Istitûts storics e culturâi, museus e locâi carateristics, cussì come al cuartîr ebraic di Kazimierz. 
La fotografie, che e mostre il grup cul nestri colaboradôr in vuide, si riferìs aes minieris di sal di Wieliczka, patrimoni dal Unesco, in particolâr ae Capele di S. Kinga, patrone dai minadôrs di sal.

Passe 9.000 “80 maniacs” a àn jemplât cun grant entusiasim il padilion 7 de Fiere di Padue inte gnot di miercus 31 di Otubar par assisti al grant event “80 Festival”, ven a stâi l’apontament di Halloween cui sucès no dismenteâts dai agns ‘70 e ’80. 
La iniziative organizade di Radio Company Radio 80 e à viodût esibîsi dal vîf sul palc Riccardo Fogli (inte foto), Amanda Lear, Alberto Camerini, The Twins, Kano ed i Rokets. Graziis a Vivaradio e ae preseade colaborazion de Saf, passe 200 sostenidôrs dai agns ’80 a àn podût partecipâ al event (colegât al progjet SAF “O voi a divertimi…. Sigûr!).

Il Grop Folcloristic “Val Resia” di Resie (UD) al à partecipât al Festival “X Europejskich Spotkań Mniejszości Narodowych i Etnicznych - Pod Kyczerą” , il diesim festival dai grops folcloristics che a rapresentin minorancis etnichis in Europe e no dome. L’impuartant event internazionâl si è tignût a Legnica (Polonie) dai 3 ai 9 di Lui dal 2007 e al à tocjât diviersis vilis de part meridionâl dal paîs polac, aree dulà che si cjate la minorance etniche dai “Lemko” che a fevelin un dialet ucrain e rapresentade dal Grop Folcloristic “Pod Kyczerą” organizadôr dal event. Une esperience divertente e positive che o ricuardarìn par tant timp. Un grazie ai nestris autiscj!