Storie

Esempli di sucès imprenditoriâl par vê realizât une fusion tra lis aziendis publichis e privadis, che i à zovât, tra l’altri, il prin premi “stelle del trasporto” tal 1999, SAF AUTOSERVIZI FVG SpA e nas tal 1995 de union di 5 Aziendis (Collavini, Ferrari, Rosina, Olivo e Autolinee Triestine) che a operavin tal teritori par garantî i colegaments cu la Cjargne, la Basse, lis zonis di Codroip e di Cividât e, di Triest, cun chês che cumò a son la Slovenie e la Cravuazie.


Il percors strategjic che al à come fin la concentrazion dai vetôrs di traspuart regjonâl si consolide par vie dal ingrès de Saita e de La Gradese, no dome slargjant il bacin teritoriâl, ma rindint plui fuart ancje il procès za in at di omogjenizazion di mieçs, oms e struturis des diferentis Aziendis. 

Daspò de assegnazion dai Servizis pe Unitât di Gjestion Udinês midiant de costituzion di un ATI che al cjape dentri ancje ATM di Udin (servizi urban), SAF si trasforme, tal 2001, in S.p.A. e e devente concessionarie uniche pal Traspuart Public Locâl urban e extraurban fintremai al 2010 tal teritori di competence. Ae strategjie di svilup par mieç de evoluzion dai servizis fier-gome e de integrazion modâl e tarifarie, SAF e rispuint, tal 2004, jentrant a fâ part dal colòs inglês ARRIVA: in bande a un fuart lidrisament sul teritori si cjate duncje la apartignince a un grup internazionâl che, in espansion continue, al gjestìs in 9 Paîs Europeans plui di 33.000 dipendents e plui di 24.000 mieçs: trens, autobus, taxi, traghets e mieçs a nauli che ogni an a garantissin plui di un miliart di corsis. 

Cheste presince adun di dôs animis che a somein cussì diferentis (la apartignince a un grant grup inglês e la teritorialitât gjestionâl) si son fondudis di pôc timp intun Protocol sotscrit cu la Provincie di Udin, la Regjon FVG e ARLeF e daûr di chel SAF si impegne a publicâ il so materiâl informatîf istituzionâl tes lenghis che di fat a son plui sintudis te sfere teritoriâl dal servizi: il Furlan e l’Inglês. 
  

Cognossincis di setôr, tecnologjie e rispiet pal ambient a caraterizin il grup che al opere par mieç di 630 dipendents organizâts li de unitât centrâl di Udin e li des unitâts locâls di Tarvis, Tumieç e Triest, cui lôr dipuesits, parcs e rimessis e i lôr servizis, dulà che si cjatin plui di 600 bilietariis e rivenditis, metudis su dute la aree servide.

SAF e risulte jessi protagoniste cence discussion tal teritori dulà che e opere: ogni an e svilupe plui di 850.000 corsis e di chestis plui di 320 mil su lis liniis urbanis e pôc mancul di 530 mil su lis liniis extraurbanis, cuntune medie di cirche 3000 corsis in dì che a impegnin plui di 320 autiscj e pôc mancul di 340 corieris ogni dì. 
Cun di plui, cui siei servizis SAF, ancje in colaborazion cun altris aziendis, e coleghe cun liniis zornaliris e par plui setemanis Slovenie, Cravuazie, Austrie, France, Lussemburc, Belgjiche e Spagne, puartant ogni an cuasi 160 mîl passizîrs su plui di 850 mil Km, su corieris furnidis di comforts modernis, a pueste par fâ viaçs cussì luncs. Dut chest nol è pensabil fûr che cuntun pont di viste di rispiet pal ambient e pes personis: plui dal 90% dal parc dai autobus in servizi te rêt urbane al va a metan e chest al à permetût ae citât di Udin di metisi te prime posizion de speciâl classifiche taliane di Legambiente par vie che e dopre autobus che no incuinin. Cun di plui, cul Comun e la Provincie di Udin SAF e sta sperimentant sistemis tecnologjics di avanguardie par favorî la mobilitât di personis disabilis dentri di un progjet che al ponte ae inovazion di dutis lis proceduris gjestionâls di servizi: ûs di imprescj cui rais infraròs par chei che a viodin pôc e par chei che no viodin, di pedanis mobilis pai disabii tal movisi, di sistemis a clamade pe mobilitât dai anzians, la ativazion di centrâls operativis pe gjestion dai servizis dedicâts e l'ûs di imprescj pe localizazion sul teritori dai mieçs e par favorî la sigurece tal mieç public.


La ativitât complessive di SAF, no pues no jessi aumentade cul impegn costant a supuart dai aveniments e dai events proponûts dal teritori gjenerâl.

Lis grandis manifestazions nazionâls:

- il 45m aniversari des Frecis Tricolôrs, lis Adunadis dai Alpins, il premi "Ambiente Carnia Alpe Verde";  

- lis fiestis enogastronomichis: "Aria di Festa" a Sant Denêl, "Friuli Doc" a Udin, La Fieste dal Pressut a Sauris. i "Eno Tours" di Lignan tal tierç mileni;

- i grancj events sportîfs: lis "Universiadi" di Tarvis, i EYOF di Lignan, il Zîr di Italie in biciclete, i Campionâts mondiâi di biathlon di For Davôtri, la "Maratonina" di Udin ;

- i events musicâi: il Festival de musiche reggae Sunsplash a Osôf, il conciert dai Red Hot Chili Peppers a Udin, il Freecormorock a Udin ;

- i events fieristics: "Innovaction", "Casa Moderna" e lis altris esposizions promovudis di Udin e Gurize Fieris;

a son dome cualchi esempli dai tancj che si contin, tra i standard ofierts al public, dai servizis SAF.


La Aziende e à concuistât un puest di lustri tal setôr des manifestazions culturâls di grande scjale: al Premi leterari Hemingway di Lignan e à metût dongje la iniziative in viaggio con un libro al pont di meretâ il “Gran Prix Stella d’Oro 2005” pe categorie Viaçs, Turisim e Timp libar. I progjets Remida e Abitanti in corriera che tra l’altri al à vût assegnât il Premi Internazionâl “Exposcuola 2006”, ducj i doi realizâts dal Museu dai Fruts di Udin, a àn permetût a SAF di partecipâ in maniere ative ae promozion de mobilitât dolce.