TRASPUART PUBLIC LOCÂL

A son servizis di linie pal traspuart coletîf di personis o robis a ofierte cence diferencis, destinade ancje a fassis omogjenis di utents, fats vie tiere e vie mâr cun itineraris, frecuencis e tarifis prestabilidis, in maniere continuative o periodiche, ancje a caratar stagjonâl, de Regjon FVG. 

Si puedin classificâ in: 

SERVIZIS EXTRAURBANS:

chei gjestîts de SAF a passin par cirche 150 comuns de provincie di Udin e des altris provinciis regjonâls (cualchi linie e rive fin in Venit e te provincie autonome di Bolzan). I servizis a son ofierts vie par 103 liniis, a son diferenziâts su la base dal periodi e si davuelzin (salf Udin-Tarvis e Glemone-Tarvis fatis ducj i dîs dal an) vie par dut l’an gjavadis fûr lis zornadis di Nadâl, Prin dal an, Pasche e Prin di Mai, daûr di ce che al è autorizât. Tal 2007, i servizis extraurbans a àn traspuartât plui di 11 milions di passizîrs (+2,46% vs 2006), cuntune flote di plui di 300 corieris di etât medie pôc superiôr di 7 agns, su cuasi 13 milions di Km percorûts.

SERVIZIS URBANS:

a interessin Udin e cualchi comun limitrof, Glemone e Lignan (dome dal periodi estîf). In dut si trate di 19 liniis, percorudis cuntune flote di plui di 75 autobus (61 di lôr alimentâts a metan e 5 a alimentazion ibride gasoli/eletric) che, tal arc dal 2007, a àn traspuartât plui di 10 milions di passizîrs (+ 5,6% vs 2006) par un totâl di plui di 3 milions di Km percorûts.
Tes zornadis des fiestis principâls, daûr dal esercizi autorizât, i servizis urbans si davuelzin cul orari ridot (salf il Prin di Mai cuant che a son sospindûts): al Prin dal an a tachin aes 08.00, a Pasche e a Nadâl a finissin a 1.00 dopomisdì, a Sant Silvestri a finissin aes 10.00 sore sere.

SERVIZIS MARITIMS:

a coleghin, tal periodi estîf, Lignan e Maran e, te zornade dal marcjât setemanâl, par mieç dal servizi fluviâl, Lignan e Tisane. Lis liniis, che a son fatis con 2 motonâfs e a garantissin ancje la integrazion modâl cul servizi extraurban Udin-Tisane-Lignan e cun chel urban di Lignan, tal 2007 si son davueltis cun 800 corsis che a àn traspuartât plui di 23.000 passizîrs (+9,85% vs 2006).

SERVIZIS ADIZIONÂI:

si codifichin cussì i colegaments jenfri il cjâf lûc e lis singulis frazions di Davâr, Paluce, Darte, Pontebe, Comelians, Grimac, Drencje, Sant Lenart e Zui, cul fin di incentivâ la permanence abitative tes zonis montanis.

_

  stampe
  Invie